धाराशिव – समय सारथी
मी ड्रग्ज, गांजा विकणार नाही, जुगार मटकातुन पैसा कमावणार नाही असे तुळजापुरमधील उमेदवाराचे 100 रुपयांच्या स्टॅम्प पेपरवरील नोटरी केलेले शपथपत्र व्हायरल झाले आहे, या शपथ पत्रातून तुळजापूर येथे उमेदवार काय काय करत असतील याची कल्पना मिळेल.
प्रिय मतदार बंधू भगिनींनो मी पत्रकार शुभम कमल कदम तुळजापूर नगर परिषद सार्वत्रिक निवडणूक 25 या लोकशाहीच्या उत्सवामध्ये रिपब्लिकन पार्टी ऑफ इंडिया आठवले पक्षाचा उमेदवार म्हणून प्रभाग क्रमांक 2(अ) अनुसूचित जाती पुरुष या प्रवर्गातून निवडणूक लढवीत आहे. मी पत्रकार आणि युवक तालुकाध्यक्ष म्हणून अभिवचन देतो की मी निवडून आल्यानंतर मी मटका व्यवसाय करणार नाही, मी जुगार खेळाचा अड्डा टाकून पैसे कमविणार नाही, मी गांजा विकणार नाही, मी ड्रग्ज विकणार नाही, मी स्वता: अथवा माझ्या सोबतच्या कोणालाही टपरी टाकून मटका घे म्हणून प्रोत्साहन देणार नाही असे त्यात नमुद केले आहे.
निवडणूकीत सामान्य जनतेने प्रामाणिकपणे लोकशाही प्रबळ करण्यासाठी मतदान करून मला निवडून दिलेल्या मताचा कायम आदर करेन आणि नगर परिषद कार्यालयातून जनतेच्या सेवा सुविधा उपलब्ध करून देण्यासाठी प्रामुख्याने प्रयत्नशील राहिल. प्रभागात स्वच्छता,लाईट, लहान मुलांसाठी त्यांचे हक्काचे मैदान अबाधित राखण्यासाठी आवश्यक उपाययोजना करेन.
श्री क्षेत्र तुळजापूर शहरात श्री तुळजाभवानी देवीच्या दर्शनासाठी येणाऱ्या भाविकांची पार्किंग व्यवस्थेच्या नावाखाली होणारी लुट थांबविण्यासाठी प्रयत्न करेन, तुळजापूर पोलिस स्टेशनचे पोलिस कर्मचारी यांच्याकडून भाविकांकडून वसूल केला जाणारा जजिया कर आकारून केली जाणारी लुट थांबविण्यासाठी भक्कमपणे आवाज उठवीण.
जनतेने लोकशाही जिवंत ठेवण्यासाठी मला मतदान करून निवडून दिलेल्या मतदारांचा माजी गुत्तेदारी चालावी केलेल्या गुत्तेदारीचे बिल काढण्यासाठी सत्ताधाऱ्यांशी स्वार्थासाठी हात मिळवणी करणार नाही.प्रभागात होणारे विकास कामांच्या दर्जेत मी हलगर्जीपणा खपवून घेणार नाही.
मी निवडून येण्यासाठी कोणालाही पार्टी देणार नाही, कोणालाही दारू पाजणार नाही गढूळ झालेल्या नितीमुल्य आणि राजकारणात ढासाळलेल्या स्तरत मी उंचावेल. मी निवडून आल्यानंतर जनतेला गृहीत धरून स्वताचा स्वार्थ साधणार नाही. मी मत विकत घेणारा व्यापारी नाही तर पत्रकार म्हणून समाजाचे वास्तव मांडणारा दर्पण आहे आपल्या भूमिकेशी प्रामाणिक राहणारा कार्यकर्ता आहे. मी आज मत विकत घेऊन उद्या निवडणूकीत गुंतवलेला पैसा काढणारा व्यापारी नाही, पैशातून सत्ता आणि सत्तेतून पैसा हि रणनीती माझी नाही मी पत्रकार आहे. प्रामाणिक कार्यकर्ता आहे.
