धाराशिव – समय सारथी
1 कोटी रुपयांच्या सीएसआर निधीचे आमिष दाखवून धाराशिव जिल्ह्यातील तुळजापूर येथील एका नामांकित संस्थेतील प्रभारी प्राचार्य जीवन पवार यांना 9 लाख रुपयांचा गंडा घातल्याची घटना घडली आहे. या प्राध्यापकाला त्याच्या संस्थेला 1 कोटी रुपयांचा निधी देतो मात्र त्यासाठी 9 टक्के प्रमाणे 9 लाख रुपये आधी द्यावे लागतील असे सांगण्यात आले. 9 लाख रुपये दिल्यावर 1 कोटी रुपयांचा निधी रोख हा दिला जाईल असे आरोपीकडुन सांगण्यात आले. 9 लाख घेतल्यावर त्याला एक बॅग देण्यात आली त्यात 1 कोटी म्हणुन खेळण्यातील नोटा होत्या. पवार यांनी फसवणूक झाल्यावर त्याची माहिती मुरुड पोलिसांना दिली त्यानुसार स्टेशन डायरीला या घटनेची नोंद घेतली असुन तक्रार न दिल्याने गुन्हा नोंद झालेला नाही. पवार हे कर्जबाजारी झाल्याचे कळते, झटपट पैसे मिळवून कर्जमुक्त होण्यासाठी ते अमिषाला भुलले व केलेली उठाठेव चांगलीच अंगलट आली आहे. ‘तेरी मेरी चुप ‘ असे म्हणत गप्प बसायची वेळ आली आहे.
1 कोटी CSR निधीचे आमिष दाखवण्यात आले त्याला तो भुलला, त्याने 9 लाख रोख कॅश देण्याचे मान्य केले व आरोपीनी त्याला पैसे घेऊन लातुर जिल्ह्यातील मुरुड येथे येण्यास सांगितले. त्यानुसार हा प्राचार्य तिथे गेला, दोघांची भेट झाल्यावर त्याला एका गाडीत बसवून नेण्यात आले व तिथे 9 लाख घातल्यावर एका बॅगेत 1 कोटी असल्याचे सांगत ती बॅग देण्यात आली, कोणीतरी पाहील इथे उघडू नका असे म्हणुन त्याला जायला सांगितले त्यानंतर प्रचार्याने आपला फायदा झाला असे म्हणत बॅग उघडली तेव्हा त्याने डोक्याला हात लावला, त्या बॅगेत चक्क लहान मुलांच्या खेळण्यातील डुप्लिकेट नोटा होत्या. 9 लाख तर गेलेच पण हाती फक्त रद्दी आली. या नंतर हा प्राचार्य पोलीस ठाण्यात गुन्हा नोंद करायला गेला मात्र तिथे काही जणांनी संगितले की यात तुम्ही पण अडकता, आरोपी होता, प्रतिष्ठा जाईल बदनामी होईल. मग काय हे महाशय पायाला भिंगरी बांधून तिथून सुसाट तुळजापूरला आला आहे.
सीएसआर निधी हा सामाजिक संस्था व इतरांना सामाजिक कामे करण्यासाठी विविध कंपनीच्या मार्फत दिला जातो, हा निधी कधीही रोख स्वरूपात दिला जात नाही, तो संबंधित संस्थेच्या बँक खात्यावर दिला जातो. त्यापूर्वी त्या संस्थेचे कार्य, आर्थिज स्तिथी व ज्यासाठी निधी वापरला जाणार आहे त्या प्रकल्प अहवाल घेतला जातो. सीएसआर हा कंपन्यांनी समाजकल्याणासाठी खर्च करावयाचा निधी आहे. भारतातील कंपन्या अधिनियम, 2013 अंतर्गत कलम 135 नुसार काही विशिष्ट कंपन्यांना ( 5 कोटी पेक्षा निव्वळ नफा, 500 कोटी पेक्षा अधिक मालमत्ता, 1 हजार कोटी पेक्षा अधिक वार्षिक उलाढाल ) त्यांच्या निव्वळ नफ्याचा एक निश्चित टक्का सामाजिक कार्यांसाठी खर्च करणे बंधनकारक आहे. पात्र कंपन्यांनी त्यांच्या मागील तीन आर्थिक वर्षांच्या सरासरी निव्वळ नफ्याच्या किमान 2 % सीएसआर उपक्रमांवर खर्च करणे आवश्यक असते. मोठ्या कंपन्याची नावे सांगून फसवणूकीचे प्रमाण वाढले आहे. मार्च एंड आहे, त्यापूर्वी हा सीएसआर निधी खर्च करायचा आहे, आमच्याकडे करोडो निधी आहे, कमिशन द्या, निधी घ्या असे म्हणत फसवणूक करणारी मोठी टोळी असुन यात अनेक जन फसले आहेत.
