शासकीय वैद्यकीय महाविद्यालयाचा प्रस्ताव आयुर्विज्ञान आयोगाने नाकारला
महाविकास आघाडी सरकार व प्रशासनाची अक्षम्य चुक – आ राणाजगजितसिंह पाटील
उस्मानाबाद – समय सारथी
जिल्हावाशियांसाठी अत्यंत महत्त्वाच्या असलेल्या शासकीय वैद्यकीय महाविद्यालयाला राष्ट्रीय आयुर्विज्ञान आयोगाने मान्यता नाकारल्याने मोठी खळबळ उडाली आहे, प्रस्ताव दाखल करताना नेमक्या कोणी चुका केल्या त्यांना जबाबदार धरून त्यांच्यावर ठोस कारवाई करण्याची मागणी होत आहे. दरम्यान राज्याचे वैद्यकीय शिक्षण मंत्री गिरीश महाजन व वैद्यकीय शिक्षण व औषधी द्रव्य विभागाचे सचिव श्विजय सौरभ यांच्याबरोबर चर्चा करून त्रुटींची पूर्तता दर्शविणारा फेर प्रस्ताव तातडीने दाखल करण्याचे व शैक्षणिक वर्ष २०२२-२३ मध्ये प्रवेशासाठी युद्ध पातळीवर प्रयत्न करण्यात येणार असल्याची माहिती आमदार राणाजगजितसिंह पाटील यांनी प्रसिद्धी पत्रकाद्वारे दिली आहे.
अनेक वर्षाच्या संघर्षानंतर सन २०१६ साली उस्मानाबाद येथील महाआरोग्य शिबिर दरम्यान तत्कालीन वैद्यकीय शिक्षण मंत्री गिरीश महाजन यांनी शासकीय वैद्यकीय महाविद्यालयाची घोषणा केली, त्या अनुषंगाने शासन स्तरावर प्रस्ताव तयार करून समिती गठीत करण्यात आली. समितीने तपासणी करून सकारात्मक अहवाल दिला मात्र तद्नंतर सरकार बदलल्याने हा विषय अनेक दिवस प्रलंबित राहिला. बऱ्याच पाठपुराव्यानंतर २७ जानेवारी २१ रोजी याबाबतीतला शासन निर्णय निर्गमित करण्यात आला. पुरेशी तयारी न करता तत्कालीन प्रशासनाकडून राष्ट्रीय आयुर्विज्ञान आयोग समिती समोर हा विषय जाऊ दिला. राष्ट्रीय आयुर्विज्ञान आयोग समिती (NMC)ने उस्मानाबाद येथे वैद्यकीय महाविद्यालयाच्या जागेस 4 फेब्रुवारी 2022 रोजी भेट देऊन पाहणी केली व यात काही गंभीर त्रुटी काढल्या. या त्रुटींची पूर्तता करण्यासाठी तत्कालीन वैद्यकीय मंत्री यांच्याकडे सातत्याने पाठपुरावा करण्यात आला. मात्र महाविकास आघाडी सरकारकडून हा विषय गांभीर्याने घेतला गेला नाही व २५ ऑगस्ट २०२२ रोजी अयोगाने प्रस्तावित शासकीय वैद्यकीय महाविद्यालयाला शैक्षणिक वर्ष २०२२-२३ मध्ये मंजूरी नाकारल्याचे पत्र पाठविले.
त्रुटींची पूर्तता दर्शविणारा अहवाल मंगळवार 6 सप्टेंबर 2022 राष्ट्रीय आयुर्विज्ञान आयोगाकडे सादर करण्याचे ठरले आहे. वैद्यकीय शिक्षण व संशोधन विभागाचे आयुक्त विरेंद्र सिंग यांच्यासह शासकीय वैद्यकीय महाविद्यालय, उस्मानाबादचे अधिष्ठाता डॅा. संजय राठोड यांना या विषयाची जबाबदारी देण्यात आलेली आहे असे आमदार पाटील यांनी कळविले आहे.
सदरील वैद्यकीय महाविद्यालयाला याच वर्षी मान्यता मिळवून सन २०२२-२३ मध्येच प्रवेश सुरु करण्यासाठी युद्ध पातळीवर प्रयत्न केले जातील असे महाजन यांनी आश्वासित केले आहे. फेर प्रस्ताव दाखल होताच या विषयाच्या पाठपुराव्यासाठी केंद्रीय आरोग्य व कुटुंब कल्याण मंत्री मनसुख मांडविया यांना भेटणार असल्याची माहिती आ. राणाजगजितसिंह पाटील यांनी दिली आहे.
