धाराशिव – समय सारथी
धाराशिव येथील राजकारण पुन्हा एकदा तापले असुन खासदार ओमराजे निंबाळकर यांना ‘बाळा’ असा शब्द वापरत नादी लागु नको, रडवीन व बडवीन अश्या रिल्स व्हायरल करण्यात आल्या. भाजपच्या शिस्तबद्ध गणेश विसर्जन मिरवणुक स्पर्धेत व्यासपिठावर ‘राडा’ संस्कृतीचे दर्शन गणेशभक्तांना पाहायला मिळाले. “नादी लागु नको, तुला ढोलकीला बांधून तुला बदा बदा बडवेन” असे म्हणत ओमराजे यांना डिवचले मात्र ओमराजे यांनी शांत राहून स्मितहास्य करीत ‘प्रतिसाद’ दिला. या सर्व प्रकारामुळे मल्हार पाटील यांची ‘दबंग’ अशी प्रतिमा जनमानसात ‘उजळून’ निघत फुल्ल ‘हवा’ झाली आहे.
‘कसायं दणका’ ‘मल्हार पाटील बोलते’ असे म्हणत भाजप आमदार राणाजगजीतसिंह पाटील यांचे पुत्र मल्हार पाटील आणि त्यांचे समर्थक व ओमराजे आमने सामने पहायला मिळाले. नादी नको लागु बाळा, रडू नको बाळा या गाण्यावर ‘या शीर्षकाखाली ‘बाळा’ असे हिनवत रिल्स सोशल मीडियावर व्हायरल होत आहेत. आमदार राणाजगजीतसिंह पाटील यांनी ओमराजे यांना ‘बाळा’ ही उपाधी दिली आहे त्यावरून अनेकदा वाद पेटला आहे.
भाजप शहराध्यक्ष अमित शिंदे, राहुल काकडे यांच्यासह एकेकाळी ओमराजे यांच्यासोबत असलेले माजी नगरसेवक अक्षय ढोबळे, नितीन शेरखाने यांनी गाणी म्हणत, नाचत व दंड थोपटून खासदार ओमराजेंना थेट आव्हान दिले. ओमराजे मात्र संपूर्ण प्रसंग शांतपणे पाहत स्मितहास्य करत प्रतिसाद देत होते. शिस्तबद्ध मिरवणुकीचे व्यासपीठ राजकीय आखाडा बनल्याचे भक्तांना पाहायला मिळाले.
धाराशिवच्या गणेश विसर्जन मिरवणुकीत मल्हार पाटील यांच्या राजकारणाची झलक व धमक पाहायला मिळाली, यापुर्वी देखील लोकसभा निवडणुकीसह अन्यवेळी ओमराजे व मल्हार पाटील आमने सामने आले होते, त्यांनी एकमेकांना शाब्दिक प्रहार केले होते. गणेश उत्सवात मल्हार पाटील समर्थकांच्या गराड्यात दंड थोपटून ओमराजेंना अप्रत्यक्ष आव्हान देताना दिसले. दुसरीकडे ओमराजे एकटेच उभे राहून या प्रसंगाकडे दुर्लक्ष करताना दिसले.
