धाराशिव – समय सारथी
धाराशिव जिल्ह्यातील भुम येथील फय्याज पठाण यांच्या आत्महत्या प्रकरणातील आरोपी सुरेश उर्फ सूर्यकांत कांबळे यांनी गुन्हा रद्द ( FIR Quashing) करावा यासाठी छत्रपती संभाजीनगर उच्च न्यायालयात याचिका दाखल केली आहे. या याचिकेवर 25 मार्च रोजी होणारी सुनावणी पुढे ढकलण्यात आली असुन ती आता 29 एप्रिल रोजी होणार आहे. 22 जानेवारी, 25 फेब्रुवारी, 25 मार्च असा तारखेचा प्रवास सुरु आहे तर आरोपीही फरार राहण्यात यशस्वी आहेत. कांबळे यांच्यावर 21 जुन 2023 रोजी गुन्हा नोंद झाला असुन भुम पोलिसांना ते वॉन्टेड आहेत. दरम्यान आत्महत्या प्रकरणात फिर्यादी सोबत तडजोड झाली आहे त्यामुळे गुन्हा रद्द करावा असा युक्तिवाद कोर्टात मांडला आहे. फिर्यादीने तडजोड केली असली तरी धाराशिव पोलीस हे त्यांच्या तपासावर व भूमिकेवर ठाम आहेत, त्यांनी विरोध केला आहे, त्यामुळे न्यायालयाच्या निर्णयाकडे लक्ष लागले आहे.
आत्महत्याच्या गुन्ह्यात कांबळे यांना अटकपुर्व जामीन देण्यासाठी कोणताही ठोस आधार वाटत नाही, त्यामुळे त्यांना दिलेला तात्पुरता जामीन रद्द करण्यात येतो व त्यांना भुम येथील कोर्टात 15 मार्च 2024 पुर्वी शरण (सरेंडर) होण्याचे आदेश सुप्रीम कोर्टाच्या 2 न्यायमुर्तीच्या खंडपीठाने दिले होते. न्यायमुर्ती एम एम सुंद्रेश व एसव्हीएन भट्टी यांनी हे आदेश दिले आहेत मात्र कांबळे हे शरण आले नाहीत त्यांनी सुप्रीम कोर्टाच्या आदेशाचा अवमान केला. उलट त्यांनी गुन्हा रद्द करावा यासाठी छत्रपती संभाजीनगर उच्च न्यायालयात याचिका दाखल केली आहे, ती प्रलंबित आहे.
भुम येथील 30 वर्षीय फय्याज दाऊद पठाण या तरुणाने गळफास घेऊन आत्महत्या करण्यापूर्वी एक व्हिडिओ सोशल मीडियावर पोस्ट केला. त्यात बार्शी येथील डॉ नंदकुमार स्वामी,अर्चना स्वामी,यश स्वामी व सुरेश कांबळे यांच्या मानसिक जाच व मारहाणीच्या त्रासाला कंटाळून आत्महत्या करीत असल्याचे सांगितल्याने कलम 306,323,504,506 व 34 प्रमाणे गुन्हा नोंद करण्यात आला आहे.
सर्वोच्च न्यायालयाने तात्पुरता दिलासा दिला होता मात्र त्या काळात त्यांनी अनेक गावात फटाके फोडून, जेसीबीने फुले व गुलालाची उधळण करीत वाजत गाजत मिरवणुक काढल्या. साम,दाम,दंड भेद..सिंघम, सरकार राज अश्या गाण्याच्या सुचक संदेश देणाऱ्या रिल्स व जल्लोषाचे फोटो, व्हिडिओ स्वतः सुरेश कांबळे यांनी सोशल मीडियावर टाकल्या होत्या.त्याबाबत दैनिक समय सारथीने वृत्त प्रसारित केले होते. तत्कालीन पोलीस अधीक्षक अतुल कुलकर्णी, उपविभागीय पोलीस अधिकारी गौरीप्रसाद हिरेमठ यांच्या मार्गदर्शनाली पोलीस निरीक्षक प्रल्हाद सूर्यवंशी यांनी सुप्रीम कोर्टात अहवाल दिला होता त्यानंतर जामीन रद्द केला, तेव्हापासुन ते फरार आहेत.
आत्महत्या केल्यावर माझ्या कुटुंबाचे रक्षण करा. कांबळे सारखे गुंड जर म्हणत असतील पोलीस माझे काही करू शकत नाहीत तर मग तुम्ही पोलीस चौकीला मोठे कुलपे लावा. तुमची काही गरज नाही, माझा मृतदेह तेव्हाच कुटुंबाच्या ताब्यात द्या जेव्हा सर्व आरोपी पोलिसांच्या ताब्यात जेलमध्ये असतील. माझ्या मृतदेहाला मुंग्या लागल्या तरी चालेल मात्र तो देऊ नका अशी कळकळीची विनंती विडिओमध्ये करीत फय्याज यांनी आत्महत्या केली होती.
