धाराशिव – समय सारथी
तुळजापूर ड्रग्ज तस्करी प्रकरणात मुंबई येथील संतोष खोत नावाच्या एका आरोपीला पोलिसांनी अटक केली आहे. ड्रग्ज तस्करी प्रकरणी मुंबई येथून अटक केलेली तस्कर संगीता गोळे हिला 3 मार्च पर्यंत पोलीस कोठडी दिली आहे तर तुळजापूर येथील अमित उर्फ चिमू अशोकराव आरगडे व युवराज देविदास दळवी आणि नळदुर्ग येथील संदीप संजय राठोड या 3 आरोपीना 1 मार्च पर्यंत पोलीस कोठडी दिली आहे. तुळजापूर येथील स्वराज उर्फ पिनू तेलंग हा फरार आहे.
तुळजापूर व परंडा येथे ड्रग्ज विक्री प्रकरणी गुन्हा नोंद झाला असुन परंडा येथे तपासात तस्करांची साखळी उघड झाली नाही. तुळजापूर येथे मोठ्या प्रमाणात ड्रग्ज तस्करीची कीड लागली असुन काही स्थानिक नेते हे व्यसनाच्या आहरी गेल्याने तस्करी व इतर प्रकार वाढले आहेत. दोन स्थानिक नेत्यांच्या नावांची चर्चा आहे त्यातील एकाला व्यसनमुक्ती केंद्राचे डोस सुद्धा त्यांच्या नेत्याने पाजले आहेत. ड्रग्ज तस्करीत सगळा खेळ या टोळी व त्यांच्या चेल्यांचा आहे, तुळजापूरचा बापु सध्या याचा ‘कणा’ आहे. सुरुवातीला सेवन करण्यासाठी या नेत्यांनी ड्रग्ज आणले त्यानंतर साखळी वाढत गेली व मोठे जाळे झाले. हे नेते सराईत असुन दुसऱ्याच्या नावाचे सिम व मोबाईल पेडलरशी संपर्क साधण्यासाठी वापरत होते. ‘कणे’ चे ‘दाणे’ टाकून माल मागवला जायचा अशी माहिती आहे. तुळजापूरमधील एका नेत्याच्या संपर्कात अटकेतील आरोपी होते.
ड्रग्ज रॅकेटमधील साखळी, पेडलर व ज्याच्यासाठी हे ड्रग्ज आणले जात होते त्यांचा शोध घेणे हे पोलिसांसमोर आव्हान असुन त्या दृष्टीने काम सुरु आहे, पोलीस फासे आवळत आहेत. पोलिस अधीक्षक संजय जाधव व उपविभागीय अधिकारी डॉ निलेश देशमुख हे स्वतः यावर लक्ष ठेवुन आहेत. तामलवाडी पोलिस ठाण्याचे पोलिस निरीक्षक गोकुळ ठाकुर हे तपास करीत आहेत. तुळजापुरात विक्री करता येणारे अडीच लाख रुपयांचे 59 पुड्या एमडी ड्रग्स पकडण्यात धाराशिव पोलिसांना यश आले असुन पहिल्यांदाच इतकी मोठी कारवाई झाली असुन ड्रग्ज तस्करी रेकॉर्डवर आली. ड्रग्ज तस्करीत मोठे सिंडीकेट सक्रिय असल्याचा धाराशिव पोलिसांचा दावा आहे.
माझ्या माहितीनंतर पोलिसांनी ड्रग्ज तस्करावर कारवाई केली. 2 वेळेस ट्रॅप फेल गेला मात्र तिसऱ्यावेळी यश आल्याचा दावा आमदार राणाजगजीतसिंह पाटील यांनी केला आहे. त्यांचे जनसंपर्काचे मोठे जाळे असल्याने ड्रग्ज तस्करीचा बिमोड करण्यासाठी त्यांनी त्यांची यंत्रणा कामाला लावली आहे. आमदार राणाजगजीतसिंह पाटील यांच्या सोबत सावली सारखे असणारे काही जण ड्रग्जचे सेवन करतात, आधी त्यांनी ती नावे पोलिसांना सांगावी असा प्रश्न तुळजापूरकरानी केला आहे. नागरिकांना काही माहिती असेल तर त्यांनी ती द्यावी असे आवाहन आमदार पाटील व धाराशिव पोलिसांनी केले आहे.
