धाराशिव – समय सारथी
कै पवनराजे निंबाळकर व त्यांचा ड्राइवर पै समद काझी यांच्या दुहेरी हत्याकांड प्रकरणाच्या सुनावणीवेळी कोर्टाने आरोपींच्या गैरहजेरीवरून सुनावले. या खटल्याची सुनावणी अंतीम टप्प्यात आली असुन सर्व आरोपीनी सुनावणी वेळी कोर्टात हजर राहावे. ठोस कारणाशिवाय आरोपीना कोर्टात गैरहजर राहता येणार नाही असे म्हणत सर्व आरोपीना हजर राहण्याचे आदेश दिले. या खटल्याची सुनावणी 26 ऑगस्ट रोजी मंगळवारी होणार आहे.
25 ऑगस्ट रोजी सोमवारी झालेल्या सुनावणी वेळी माजी गृहमंत्री डॉ पद्मसिंह पाटील, शुटर दिनेश तिवारी, कैलाश यादव व गजेंद्र छोटे पांडे हे 4 संशयीत आरोपी गैरहजर होते तर सतीश मंदाडे, मोहन शुक्ला व शशिकांत कुलकर्णी हे 3 आरोपी हजर होते. पारसमल जैन बादला हा माफीचा साक्षीदार असुन तो हजर होता. महात्मा उर्फ पिंटू सिंग चौधरी हा बिहार राज्यातील सिवान जेलमध्ये दुसऱ्या एका गुन्ह्यात आहे. कोर्टाने हाजीर रहो असे आदेश दिल्याने आरोपीना आता हजर राहावे लागणार आहे.
मुंबईचे अतिरिक्त सत्र न्यायाधीश सत्यनारायण नावंदर यांच्या कोर्टात ही सुनावणी सुरु असुन सरकार पक्षाच्या वतीने सीबीआय केंद्रीय गुन्हे अन्वेशन विभागाचे विशेष सरकारी वकील एजाज खान यांनी 25 ऑगस्ट रोजी काही मुद्यावर अंतिम युक्तिवाद सादर केला उर्वरित युक्तिवाद 26 ऑगस्ट रोजी मंगळवारी सादर केला जाणार आहे. यावेळी सीबीआयच्या आयपीएस अधिकारी सायली धुरत यासह अधिकारी हजर होते. समाजसेवक अण्णा हजारे यांच्यासह 128 साक्षीदार यांची यात साक्ष झाली आहे.
हत्याकांडाची सुनावणी संपवुन निकाल 30 सप्टेंबर पर्यंत देण्याचे आदेश सुप्रीम कोर्टाने दिले आहेत त्यानुसार सुप्रीम कोर्टाच्या आदेशाचे पालन व्हावे असे पत्र मुंबई उच्च न्यायालयाने 18 ऑगस्ट रोजी सुनावणीदरम्यान मुंबई ट्रायल कोर्टाला दिले आहे. माजी गृहमंत्री डॉ पद्मसिंह पाटील यांना सीबीआयने यात मुख्य आरोपी केले असुन कट रचुन हत्या केल्याचा ठपका ठेवला आहे. दुहेरी खुन खटल्यात 9 जण आरोपी असुन 4 जुलै 2011 पासुन सुमारे 14 वर्षापासुन सुनावणी सुरु आहे. सर्व 9 संशयीत आरोपी जामीनावर आहेत.
डॉ पद्मसिंह पाटील यांच्यावतीने ऍड भुषण महाडिक हे बाजू मांडत आहेत तर इतर 8 आरोपींच्या वतीने ऍड नेहा सुळे ह्या बाजु मांडत आहेत. पवनराजे निंबाळकर यांच्या पत्नी आनंदीदेवी राजेनिंबाळकर यांनी याचिका दाखल केल्याने त्यांच्या वतीने ऍड पी एम गवाड हे बाजु मांडत आहेत. यापुर्वी जानेवारी महिन्यात आरोपीच्या वतीने अंतिम युक्तिवाद झाला होता मात्र डॉ पाटील यांनी 3 साक्षीदार तपासण्याची विनंती केली त्यानुसार ती देण्यात आल्याने प्रकरण लांबले.
3 जून 2006 ला पवनराजे निंबाळकर व त्यांचा ड्राइवर समद काझी हे मुंबईवरून धाराशिवकडे पांढऱ्या रंगाच्या स्कोडा गाडीने येत असताना नवी मुंबई कळंबोली येथे दिवसा ढवळ्या गोळ्या घालून त्यांची हत्या करण्यात आली. पवनराजे हे झोपलेले असताना त्यांची गाडी हात दाखवुन थांबवण्यात आली त्यानंतर ड्राईव्हरने काच खाली घेताच गोळ्या झाडण्यात आल्या. हत्याकांडाचा तपास सुरुवातीला महाराष्ट्र पोलीस त्यानंतर, सीआयडीने केला मात्र त्यात फारसे काही निष्पन्न झाले नाही.
पवनराजे यांच्या पत्नी आनंदीदेवी यांच्या याचिकेनंतर कोर्टाच्या आदेशाने 23 ऑक्टोबर 2008 रोजी तपास सीबीआयकडे देण्यात आला. 20 ऑगस्ट 2009 रोजी सीबीआयने माजी गृहमंत्री डॉ पाटील यांना मुख्य आरोपी करीत राजकीय द्वेषातुन हत्या झाल्याचा ठपका ठेवत 9 जणांच्या विरोधात 5 हजार पानाचे चार्जशीट सादर केले. सीबीआयचे तत्कालीन जॉईंट डायरेक्टर ऋषीराज सिंग व पोलीस अधीक्षक तथा आयपीएस अधिकारी अमिताभ ठाकुर यांची भुमिका महत्वाची ठरली.याच तपासात समाजसेवक अण्णा हजारे यांच्या हत्येचा कट व सुपारी 30 लाखात दिल्याचे उघड झाले.
दुहेरी हत्याकांडात आरोपी पारसमल बादला उर्फ जैन हा माफिचा साक्षीदार बनला आहे त्याला सुरुवातीला 25 मे 2009 रोजी अटक करण्यात आली त्यानंतर त्याचं दिवशी 25 मेला शुटर दिनेश तिवारी, 30 मे ला मुंबईतील नगरसेवक मोहन शुक्ला, 31 मे ला लातुर येथील सतीश मंदाडेला अटक झाली. खुन घटनेनंतर तब्बल 3 वर्षांनी 6 जुन 2009 रोजी माजी गृहमंत्री डॉ पद्मसिंह पाटील यांना खासदार पदावर असताना मुंबईतुन अटक केली त्यानंतर राज्यात एकच खळबळ उडाली. 25 सप्टेंबर 2009 रोजी अलिबाग कोर्टाने डॉ पाटील यांना 2 लाख रुपयांच्या मुचलक्यावर जामीन मंजूर केला.
15 जुन 2009 रोजी शुटर पिंटू सिंग, 10 जुलैला उत्तर प्रदेशमधील बसपा पक्षाचा नेता कैलास यादव, 1 सप्टेंबर 2009 रोजी माजी उत्पादन शुल्क निरीक्षक शशिकांत कुलकर्णी व छोटे पांडे याला 11 मार्च 2010 रोजी अटक करण्यात आली. शुटर दिनेश तिवारी व पिंटू सिंग या 2 आरोपींना तब्बल 16 वर्षानंतर जामीन सुनावणीच्या अंतिम टप्प्यात जामीन मिळाला आहे.
