धाराशिव – समय सारथी
कै पवनराजे निंबाळकर व त्यांचा ड्राइवर समद काझी या दुहेरी हत्याकांड खटल्याची उद्या 8 सप्टेंबर रोजी सुनावणी होणार आहे. सरकार पक्षाच्या वतीने सीबीआय व तक्रारदार / याचिकाकर्ता आनंदीदेवी राजेनिंबाळकर यांच्या वतीने लेखी युक्तीवाद सादर झाल्यानंतर आता डॉ पद्मसिंह पाटील यांच्यासह 9 आरोपींच्या वतीने अंतिम युक्तिवादाला सुरुवात होणार आहे. मुंबईचे अतिरिक्त सत्र न्यायाधीश सत्यनारायण नावंदर यांच्या कोर्टात सुनावणी होते आहे.
राजकीय कारकीर्द व अस्तित्वाला धोका निर्माण झाल्याने माजी गृहमंत्री डॉ पद्मसिंह पाटील, सतीश मंदाडे व मोहन शुक्ला यांनी कट रचत 25 लाख रुपयांची सुपारी देऊन हत्या केल्याचा ठपका सीबीआयने 20 ऑगस्ट 2009 रोजी दाखल केलेल्या दोषारोप पत्रात केला आहे. सीबीआयने सादर केलेल्या युक्तिवादनंतर आरोपीचे वकील त्यांची बाजु कोर्टात मांडणार आहेत. हा खटला सुनावणीच्या अंतिम टप्प्यात असुन निकाल द्यावा असे आदेश सुप्रीम कोर्टाने दिले आहेत.
डॉ पाटील यांच्यासह 9 आरोपीनी शांत डोक्याने नियोजनबद्ध कट रचून हे हत्याकांड केले, संशयाच्या पलीकडे जाऊन सर्व पुरावे असल्याने व आरोप सिद्ध होत असल्याने आरोपीना मृत्यु दंडाची शिक्षा करावी अशी विनंती आनंदीदेवी राजेनिंबाळकर यांनी कोर्टास युक्तिवादात केली आहे. आरोपी सतीश मंदाडे व डॉ पद्मसिंह पाटील, मोहन शुक्ला हे व्यावसायिक भागीदार / पार्टनर होते. या सगळ्यांची पुर्वीपासून ओळख व कौटुंबिक संबंध होते, हत्यापुर्वी व हत्येनंतरचा घटनाक्रम, पुरावे कोर्टात मांडले आहेत.
सीबीआयच्या वतीने ऍड एजाज खान, निंबाळकर यांच्या वतीने ऍड पी एम गवाड यांनी बाजु मांडली तर डॉ पाटील यांच्या वतीने ऍड भुषण महाडिक तर इतर आरोपीच्या वतीने ऍड नेहा सुळे ह्या बाजु मांडत आहेत. आरोपी पारसमल जैन बादला हा माफीचा साक्षीदार आहे, हत्याकांडातील सर्व आरोपी जामीनावर असुन त्यांनी सुनावणीसाठी कोर्टात हजर राहावे असे आदेश कोर्टाने दिले आहेत.
पवनराजे निंबाळकर यांची 3 जुन 2006 रोजी हत्या झाल्यानंतर त्याचा तपास महाराष्ट्र पोलिस, सीआयडी त्यानंतर सीबीआयने केला. आनंदीदेवी यांनी मुंबई उच्च न्यायालयात दाखल केली होती त्यानंतर कोर्टाच्या आदेशाने हा तपास 23 ऑक्टोबर 2008 रोजी सीबीआयकडे वर्ग केला त्यानंतर सीबीआयने 7 महिन्यांनी पारसमल जैन याची मुलगी वर्षा हिच्या पत्रानंतर 25 मे 2009 रोजी गुन्ह्याची उकल केली. हत्याकांडनंतर तब्ब्ल 3 वर्षांनी माजी गृहमंत्री डॉ पद्मसिंह पाटील यांच्यासह 9 जणांना आरोपी करीत अटक केली.
माजी गृहमंत्री डॉ पद्मसिंह पाटील, पारसमल जैन बादला, शुटर दिनेश तिवारी, मुंबईतील नगरसेवक मोहन शुक्ला, लातुर येथील सतीश मंदाडे, शुटर पिंटू सिंग, उत्तर प्रदेशमधील बसपा पक्षाचा नेता कैलास यादव, माजी उत्पादन शुल्क निरीक्षक शशिकांत कुलकर्णी व छोटे पांडे हे संशयीत आरोपी आहेत.
