धाराशिव – समय सारथी
अमली पदार्थाची तस्करी करणारी टोळी जाळ्यात अडकली असुन 16 लाख रुपयांचा 81 किलो गांजासह 2 आरोपीना अटक करण्यात आली आहे. स्थानिक गुन्हे शाखा व वाशी पोलीस ठाण्याची संयुक्त कारवाई केली.
धाराशिव जिल्ह्याचे पोलीस अधीक्षक संजय जाधव यांनी स्थानिक गुन्हे शाखेच्या सपोनी कासार व पथकाला जिल्ह्यामध्ये अम्ली पदार्थ विक्री करणाऱ्या व्यक्तींचा शोध घेऊन त्यांच्यावर कडक कारवाई करण्याचे आदेशित केले होते. स्थानिक गुन्हे शाखेच्या पथकाला धाराशिव अहमदनगर व बीड जिल्ह्यातील काही इसमांची एक टोळी गांजाची विक्री मध्ये कार्यरत असल्याची माहिती मिळाली होती त्याअनुषंगाने स्थानिक गुन्हे शाखेच्या पथकाने या सर्वांना एकत्रित पकडण्याकरिता सापळा लावला. स्थानिक गुन्हे शाखेचे सपोनि कासार व पथकाला गोपनीय बातमीदारामार्फत खबर मिळाली की सदरची टोळी ही वाशी पोलीस ठाणे अंतर्गत मांडवा शिवार येथे राखाडी रंगाची स्विफ्ट डिझायर मोटर कार मधून गांजा विक्री करता येणार आहेत.
स्थानिक गुन्हे शाखेच्या पथकाने तात्काळ सदर ठिकाणी सापळा रचून छापा टाकला असता संशयित मोटर कारमध्ये चार प्लास्टिकचे गोण्यामध्ये उग्र वास असणारा गांजा मिळून आला. तसेच सदर ठिकाणी उपस्थित असलेल्या सहा व्यक्ती पैकी दोन जणाला तात्काळ ताब्यात घेण्यात आले तर इतर चार व्यक्ती अंधाराचा फायदा घेऊन पळून गेल्या. घटनास्थळावरून 81. 44 किलो हिरव्या रंगाचा उग्र वास येत असलेला गांजा एकूण किंमत 16 लाख 29 हजार 760 व गुन्ह्यात वापरलेले चार चाकी वाहन, तीन मोटरसायकल एकूण 11 लाख असा एकूण 27 लाख 29 हजार 760 रुपये किमतीचा मुद्देमाल मिळून आला.
प्रसाद उर्फ विकी भागवत पवार वय 22 वर्षे राहणार साळेगाव तालुका केज जिल्हा बीड हल्ली मुक्काम कळंब,गंगाराम उर्फ शेषराव रावसाहेब पवार वय 36 वर्षे रा सदाफुले वस्ती जामखेड जि अहिल्यानगर यांना अटक केली आहे.पोस्ट वाशीचे प्रभारी अधिकारी पोलीस निरीक्षक संग्राम थोरात व पथक यांच्या मदतीने पंचनामा करून मिळून आलेला मुद्देमाल जप्त करण्यात आला. सपोनि कासार यांनी दिलेल्या फिर्यादीवरून एकूण सहा व्यक्तींविरुध्द एनडीपीएस कलमान्वये गुन्हा दाखल करण्यात आला असून इतर चार फरार आरोपींचा शोध पोलीस घेत आहेत.सदरची कारवाई पोलीस अधीक्षक संजय जाधव, व अप्पर पोलीस अधीक्षक गौहर हसन यांच्या मार्गदर्शनाखाली स्थानिक गुन्हे शाखेचे सपोनि सुदर्शन कासार, सपोफौ- वलीउल्ला काझी, पोलीस हवालदार शौकत पठाण, फहरान पठाण,पोलीस अंमलदार योगेश कोळी,चालक पोलीस अंमलदार रत्नदीप डोंगरे,नितीन भोसले तसेच पोलीस ठाणे वाशीचे पोलीस निरीक्षक थोरात सपोनि सावंत व पथक यांच्या पथकाने केली आहे
