कै पवनराजे हत्याकांडात माफीचा साक्षीदार पारसमल जैनने सांगितला कोर्टात हत्येचा कट
डॉ पदमसिंह पाटील यांची ओळख पटवली – पुढील सुनावणी आता 26 ऑक्टोबरला
उस्मानाबाद – समय सारथी
कै पवनराजे हत्याकांडात माफीचा साक्षीदार पारसमल जैनने कोर्टात हत्येचा कट कसा रचला व त्यावेळी कोण कोण संबंधित होते याचा इतिवृत्तांत कोर्टात सुनावणी दरम्यान मांडला. कै पवनराजे व त्यांचा ड्राइवर समद यांच्या दुहेरी हत्याकांडात डॉ पदमसिंह पाटील हे प्रमुख आरोपी असुन त्यांना सीबीआयने अटक केली होती. पारसमल जैन याने कोर्टात डॉ पदमसिंह पाटील यांची ओळख पटवली असल्याने त्यांच्या अडचणीत भर पडली आहे या प्रकरणाची पुढील सुनावणी आता 26 ऑक्टोबरला होणार आहे.
13 ऑक्टोबर 21 रोजी कै पवनराजे निंबाळकर व त्यांचा ड्राईवर समद काझी यांच्या दुहेरी हत्याकांडात मुंबई सत्र न्यायालयात सुरू असलेल्या सीबीआय विरुद्ध डॉक्टर पद्मसिंह पाटील व इतर आरोपी या खटल्यातील आरोपी क्रमांक 4 पारसमल जैन याने अर्ज करीत माफीचा साक्षीदार होण्यासाठी विनंती केली होती.सदरचा अर्ज मंजूर झाल्यानंतर मागील महिन्यापासून माफीचा साक्षीदार पारसमल जैन यांची साक्ष न्यायालयात नोंदणी चालू होती त्यावेळी त्याने स्व. पवनराजे निंबाळकर यांचा खून केल्याचे कबूल करून सदर कटात डॉक्टर पद्मसिंह पाटील, सतीश मंदाडे, मोहन शुक्ला इत्यादी आरोपी यांचे संबंध त्याच्यासोबत कसे आले होते हे कोर्टासमोर सांगितले तसेच सदर केसमध्ये खूना संदर्भात झालेला घटनाक्रम जशास तसा कोर्टासमोर उलगडून सांगितला त्यानंतर सदर साक्ष नोंदविण्याच्या शेवटच्या भागात पारसमल जैन यांच्याशी ज्या आरोपींचा संबंध आला त्यांची ओळख पटवण्यासाठी मागील तारखेस डॉक्टर पद्मसिंह पाटील वगळता इतर आरोपींची ओळख न्यायालयास पटवून दिली होती त्यावेळी डॉक्टर पद्मसिंह पाटील हजर नव्हते म्हणून न्यायालयाने 13 ऑक्टोबर 2021 रोजी डॉक्टर पद्मसिंह पाटील यांना न्यायालयात हजर राहण्याबाबत आदेश केल्यानुसार डॉक्टर पद्मसिंह पाटील न्यायालयात हजर झाले असता आरोपी पारसमल जैन याने डॉक्टर पद्मसिंह पाटील यांची ओळख न्यायालयास पटवून दिली व सदर माफीचा साक्षीदार आरोपी पारसमल जैन यांची सीबीआयच्यावतीने सर तपासाची साक्ष नोंदणी संपली.
माफीचा साक्षीदार पारसमल जैन याचा उलट तपास आरोपींच्या वतीने घेण्यासाठी पुढील तारीख 26 ऑक्टोबर 2021 नेमलेली आहे. त्यामुळे सदर प्रकरण उत्तरार्धकडे चालले असून लवकरच निर्णय होईल याची शक्यता आहे. सदर प्रकरणात सीबीआयच्या वतीने विशेष सरकारी वकील एजाज खान प्रकरणातील फिर्यादी निंबाळकर कुटुंबियांच्या वतीने ॲड. पांडुरंग गवाड व ॲड. रमेश मुंढे हे काम पाहत आहेत.
3 जुन 2006 रोजी नवी मुंबई येथील कळंबोली येथे पवनराजे निंबाळकर व त्यांचा ड्राइवर समद काझी यांची दिवसाढवळ्या गोळ्या घालून हत्या करण्यात आली. मुंबई उच्च न्यायालयाच्या आदेशाने या रक्तरंजीत हत्याकांडाचा तपास 23 ऑक्टोबर 2008 रोजी सीबीआयकडे वर्ग करण्यात आला. सीबीआयने तपासाअंती 6 जुन 2009 रोजी राज्याचे माजी गृहमंत्री डॉ पदमसिंह पाटील यांना अटक केली. सीबीआयचे तत्कालीन जॉइंट डायरेक्टर ऋषीराज सिंग यांनी ही कारवाई करीत डॉ पाटील यांच्या घरावर छापा टाकला व मोठा अवैध शस्त्रसाठा जप्त केला. सीबीआयने 5 हजार पानांचे चार्जशीट अलिबाग कोर्टात दाखल केले. डॉ पाटील हे 25 सप्टेंबर 2009 पासुन या प्रकरणात जामीनावर आहेत तर अन्य काही आरोपी जेलमध्ये आहेत.
अण्णा हजारे यांच्या हत्याची पण दिली होती सुपारी – 12 वर्षांपासून तपास सुरूच
पवनराजे हत्याकांडात अटक आरोपी पारसमल जैन याला अटक केल्यानंतर त्याने न्यायधीश एस बी महाले यांच्या कोर्टात सीआरपीसी 164 नुसार गुन्ह्याचा कबुली जबाब दिला. डॉ पदमसिंह पाटील यांनी पवनराजे बरोबरच समाजसेवक अण्णा हजारे यांच्या हत्येची सुपारी 30 लाख रुपयात सतीश मंदाडे याच्या मार्फत दिली होती मात्र ती आपण नाकारली होती. जैन याने दिलेल्या जबाबनंतर अण्णा हजारे यांनी डॉ पाटील यांच्या विरोधात लातूर एमआयडीसी पोलीस ठाण्यात 29 सप्टेंबर 2009 रोजी हत्याचा कट व सुपारी दिल्याचा गुन्हा नोंद केला होता, 12 वर्ष झाली तरी याचा तपास अद्याप सुरूच असल्याची सूत्रांची माहिती आहे. हजारे यांनी तेरणा ट्रस्ट, पी बी सावंत आयोग,तेरणा साखर घोटाळा यासह अन्य घोटाळ्याचा उल्लेख त्याच्या जबाबात केला आहे. सीबीआयचे पोलीस निरीक्षक एन एस राजू यांनी त्यांचा 9 जुन 2009 रोजी तपासकामात 8 पानी लेखी जबाब घेतला. हे प्रकरण ही अद्याप प्रलंबित आहे.
लढा , संघर्ष कायम सुरू राहणार – हजारे प्रकरणात मुख्यमंत्री यांना भेटणार , खासदार ओमराजे
कै पवनराजे हत्याकांड झाल्यापासुन आमचे कुटुंब कायदेशीर संघर्ष करीत आहे. पवनराजे हत्याकांड झाल्यानंतर त्याचा तपास सीबीआयकडे देण्यासाठी उच्च न्यायालयात जाण्यासह रस्त्यावर उतरून मोर्चे आंदोलन करावे लागले त्यानंतर सुद्धा हा संघर्ष संपला नाही. डॉ पाटील व त्यांच्या वकिलांनी विविध क्लुप्त्या कोर्टात वापरून वेळकाढूपणाची भूमिका घेतली त्यामुळे 12 वर्षांपासून ही केस कोर्टात सुरू आहे. या काळात अनेक अनुभव आले मात्र आम्ही खचलो नाही, जो पर्यंत आम्हाला न्याय मिळत नाही तोपर्यंत हा लढा व संघर्ष कायम सुरू राहील, अण्णा हजारे प्रलंबित प्रकरणात सुद्धा आता लक्ष घालणार असुन याबाबत मुख्यमंत्री उद्धव ठाकरे यांची भेट घेणार आहे. गृहमंत्री यांनाही याबाबत बोलणार आहे असे शिवसेनेचे खासदार ओमराजे निंबाळकर यांनी सांगितले.
